ཆོས་དང་ཆོས་མིན་པ་རྣམ་པར་འབྱེད་པའི་བསྟན་བཅོས་སྡོམ་པ་གསུམ་གྱི་རབ་ཏུ་དབྱེ་བའི་རྣམ་པར་བཤད་པ་ཐུབ་བསྟན་གསལ་བའི་སྒྲོན་མེ།
༄༅། །
ཆོས་དང་ཆོས་མིན་པ་རྣམ་པར་འབྱེད་པའི་བསྟན་བཅོས་སྡོམ་པ་གསུམ་གྱི་རབ་ཏུ་དབྱེ་བའི་རྣམ་པར་བཤད་པ་ཐུབ་བསྟན་གསལ་བའི་སྒྲོན་མེ་ཞེས་བྱ་བ་བཞུགས་སོ།། ཨོཾ་སྭ་སྟི་སིདྷཾ། རབ་འབྱམས་རྒྱལ་བ་རྒྱ་མཚོའི་རྡུལ་རྙེད་བདེ་ཆེན་ཆོས་སྐུར་དབྱེར་མེད་ཀྱང་། །
འགྲོ་བའི་དོན་སླད་ཞིང་འདིའི་སྟོན་པ་ཟས་གཙང་སྲས་པོ་ཤཱཀྱའི་རྟོག །ཞབས་ཟུང་པདྨོ་རིན་ཆེན་འོད་འབར་ལྷར་བཅས་གཙུག་ན་རྟག་པར་རྒྱལ། །
འཛམ་གླིང་མཛེས་པའི་རྒྱན་དང་མཆོག་སོགས་རྒྱ་གར་རིང་ལུགས་གསལ་མཛད་པཎ་ཆེན་ཚོགས། །
འཕགས་ཡུལ་དམ་ཆོས་སྒྲོན་མེ་སྦར་ཏེ་མུན་གཏུམ་ཆོས་ཀྱི་སྣང་བས་གསལ་མཛད་པ། །
སྐྱེས་མཆོག་ལོ་པཎ་ཐུགས་རྗེ་ཅན་རྣམས་བཀའ་དྲིན་དམ་པ་སྙིང་ནས་རྗེས་སུ་དྲན། །
གང་དེའི་བྱེད་པོ་སྤྲུལ་པའི་ཆོས་རྒྱལ་མེས་དབོན་སྲས་བཅས་རྣམས་ལའང་གུས་པས་འདུད། །
ཆོ་རིགས་བཙུན་པ་གནམ་ལྷའི་རིགས་འཁྲུངས། །
དྲི་མེད་འཁོན་གྱི་རྒྱུད་པར་ལེགས་བྱོན། །
རིགས་གསུམ་རྣམ་འཕྲུལ་ས་སྐྱ་པ་ཞེས། །
གྲགས་པའི་གདུགས་དཀར་སྲིད་ན་མངོན་མཐོ། །
ཕྱི་དུས་བསྟན་དང་འགྲོ་བའི་དོན་ཕྱིར། །
འཇམ་པའི་དབྱངས་ཉིད་ངུར་སྨྲིག་གོས་འཆང་། །
བསྟན་པའི་སྒྲོན་མེ་ས་སྐྱ་པཎ་ཆེན། །
ཡིད་རབ་དང་བས་ཀུན་ནས་མཆོད་དོ། །
བསོད་ནམས་གངས་རིའི་པོ་ལ་རྣམ་འགྱིང་ཞིང་། །
བསླབ་གསུམ་ལུས་རྒྱས་ལུང་རིགས་མཆེ་སྡེར་སྒྲད། །
འཕྲིན་ལས་རལ་ཚོགས་རྣམ་པར་སྐྱོད་མཁས་པ། །
ཀུན་མཁྱེན་སྨྲ་བའི་སེང་གེས་བདག་སྐྱོངས་ཤིག །དཔག་ཡས་ནུས་ལྡན་བླ་ཆེན་རྡོ་རྗེ་འཛིན། །
མཁྱེན་རབས་དབང་པོ་རྗེ་བཙུན་འཇམ་པའི་དབྱངས། །
ཐུགས་རྗེའི་མངའ་བདག་བསོད་ནམས་རྒྱལ་མཚན་ཞབས། །
འགྲོ་བའི་མགོན་པོ་བརྒྱུད་པར་བཅས་ལ་འདུད། །
སྡོམ་གསུམ་བཀའ་དྲིན་སྩོལ་མཛད་བླ་མ་དམ་པ་དང་། །
གང་ལས་བྱུང་བའི་འཁྲུལ་མེད་བརྒྱུད་པར་ལྡན། །
དངོས་གྲུབ་འབྱུང་གནས་ཞི་ཁྲོ་ལྷ་ཡི་ཚོགས། །
བསྟན་སྲུང་འཁོར་དང་བཅས་ལ་གུས་མཆོད་ནས། །
འཁོན་སྟོན་དབང་པོའི་མཚན་ཅན་བཀའ་སྩལ་ལྕི། །
ཀླུ་རྒྱལ་གཙུག་རྒྱན་བཞིན་དུ་གུས་བླངས་ཏེ། །
སྔོན་བྱོན་མཁས་པའི་གསུང་རབ་ལ་བརྟེན་ནས། །
བསྟན་བཅོས་ཆེན་པོའི་རྣམ་བཤད་བགྱིད་པར་སྤྲོ། །
མཁས་པའི་རྣམ་བཤད་བྱུང་བའི་ཚུལ་ནི། ཆོས་རྗེ་ཉིད་ཀྱི་རང་མཆན་མདོར་བསྡུས་ཡོད། །
ཆག་ལོ་ཞང་ལོ་གློ་བོ་ལོ་ཙཱ་སོགས། །
ཆོས་རྗེ་ཁུ་དབོན་གཉིས་ཀྱི་བྲིས་ལན་རྣམས། །
སྡོམ་གསུམ་རབ་དབྱེར་དགོས་པའི་ཡི་གེ་ཡིན། །
ཆོས་རྗེའི་དངོས་སློབ་ཁང་སྟོན་ས་བཅད་དེ། །
འཕགས་པའི་དངོས་སློབ་འདུལ་སེང་ཕྱོགས་སྔར་བཀོད། །
འཕགས་པའི་དངོས་སློབ་སྤྲོ་ལུང་ཀུན་སྨོན་གྱིས། །
མཆན་དང་ས་བཅད་དཀའ་འགྲེལ་རྣམ་གསུམ་མཛད། །
སེང་གེ་དཔལ་གྱིས་ས་བཅད་དཀའ་འགྲེལ་བྱས། །
དེ་རྣམས་སྔར་གྱི་རྩ་བའི་དཔེ་ཆ་སྟེ། །
རྗེ་བཙུན་ཀུན་དགའ་བཟང་པོའི་དྲིན་གྱིས་མཐོང་། །
དམར་དང་དཔལ་གྱི་མཆན་ཡང་ཡོད་ཅེས་གསུངས། །
འདི་དག་ཆོས་རྗེ་ཡབ་སྲས་མ་གཏོགས་པ། །
ཕྱིས་ཀྱི་ཊཱིཀྐ་བྱེད་པས་མཐོང་བ་མེད། །
དཔལ་ལྡན་བླ་མའི་དངོས་སློབ་བསམ་ཡས་པས། །
རྣམ་བཤད་བཟང་པོ་རབ་འབྱམས་བྲིས་མོད་ཀྱང་། །
གོང་མའི་གསུང་རབ་རྒྱུད་གསུམ་མན་ངག་སོགས། །
རྒྱུད་སྡེའི་དོན་ལ་མཁྱེན་པ་མ་རྒྱས་པས། །
ནོར་བའི་རྣམ་གཞག་རགས་པ་དུ་མ་སྣང་། །
འཇམ་དབྱངས་རིན་རྒྱལ་དེ་ཉིད་མང་སླད་དུ། །
བུ་སྟོན་སློབ་མ་དཀོན་གྲགས་ཊཱིཀྐ་ཡང་། །