༄༅། ། རྗེ་བཙུན་རྡོ་རྗེ་འཆང་ཆེན་པོ་ལ་ཝ་བྷུ་ཏི་པའི་རྣམ་ཐར་བསྟོད་པ་བཞུགས་སོ།། ན་མོ་གུ་ར་ཝེ། རྗེ་བཙུན་རྣལ་འབྱོར་གྱི་དབང་ཕྱུག་དྲིན་ཅན་རྡོ་རིངས་པ་ཆེན་པོ་ལ། ཡོན་ཏན་རྟོགས་པར་བརྗོད་པའི་སྒོ་ནས་བསྟོད་པ་དངོས་གྲུབ་ཡིད་བཞིན་གྱི་ཆུ་གཏེར་བཞད་པ་ཞེས་བྱ་བ། རྗེ་བླ་མ་རྡོ་རྗེ་འཆང་དེ་ཉིད་ལ་གུས་པས་ཕྱག་འཚལ་ཞིང་སྐྱབས་སུ་མཆིའོ། ། རིགས་བརྒྱའི་ཁྱབ་བདག་ཀུན་བཟང་ཧེ་རུ་ཀ །བཀའ་དྲིན་མཉམ་མེད་མཁས་གྲུབ་ཆོས་ཀྱི་རྗེ། ། གསང་ཆེན་བསྟན་པའི་ཉི་མ་རྡོ་རིངས་པ། ། རྣལ་འབྱོར་དབང་ཕྱུག་ཞབས་ལ་གསོལ་བ་འདེབས། ། མགོན་ཁྱོད་ཆོས་སྐུ་བདེ་ཆེན་མཁའ་དབྱིངས་ནས། ། གཟུགས་སྐུ་ཉི་ཟླའི་སྣང་བརྙན་བགྲང་ཡས་སྤྲུལ། ། སྐལ་བར་འཚམས་པའི་ཟབ་ཡངས་འོད་འཕྲེང་གིས། ། འགྲོ་བའི་མུན་སེལ་མཆོག་ལ་གསོལ་བ་འདེབས། ། བསྐལ་བཟང་འདི་ལ་བདེ་གཤེགས་འཁོར་བ་འཇིག །ལཱ་བའི་ཞབས་དང་བྲམ་ཟེ་མཆོག་སྲེད་དང་། ། ཕག་གྲུ་པ་དང་རི་ཕུག་རྣལ་འབྱོར་སོགས། ། རྣམ་འཕྲུལ་དུ་མར་བསྟན་ལ་གསོལ་བ་འདེབས། ། དུས་འདིར་བྱང་ཕྱོགས་ཁ་བའི་སྨན་ལྗོངས་ཀྱི། ། གཙང་གི་རྡོ་རིངས་ཞེས་བྱའི་གྲོང་ཁྱེར་དུ། ། ཡབ་མཆོག་རྒྱལ་རིགས་ཡེ་ཤེས་མཁའ་འགྲོ་མའི། ། སྲས་སུ་བསམས་བཞིན་འཁྲུངས་ལ་གསོལ་བ་འདེབས། ། གཞོན་ནུའི་དུས་ནས་བྱིས་པའི་སྤྱོད་ལས་འདས། ། སྲུང་མའི་ཞལ་གཟིགས་གདུག་ཅན་འབྱུང་པོ་བཏུལ། ། རྡོ་རྗེ་འཆང་དངོས་རྗེ་བཙུན་ཨེ་ཝྃ་པས། ། ལུང་བསྟན་རྗེས་སུ་བཟུང་ལ་གསོལ་བ་འདེབས། ། པདྨས་ལུང་བསྟན་སྤྲུལ་པའི་རྒྱལ་པོ་ཡིས། ། མཆོག་ཏུ་བསྔགས་ཤིང་ཁྱིམ་པའི་སྤྱོད་ཚུལ་གྱིས། ། ཡངས་པའི་རྒྱལ་ཁམས་བྱམས་པའི་ཁྲིམས་ཀྱིས་བསྐྱངས། ། ཆོས་ཀྱི་རྒྱལ་པོ་ཁྱོད་ལ་གསོལ་བ་འདེབས། ། ཕྱི་རོལ་སྣང་བ་ན་བུན་ལྟ་བུར་ཤར། ། རང་རིག་གདོད་མའི་མགོན་པོ་རང་ཞལ་གཟིགས། ། རྒྱལ་ཚབ་བླ་མས་བསྟོད་བསྔགས་ཤིས་བརྗོད་མཛད། ། ཉམས་རྟོགས་ཡེ་ཤེས་འཁྲུངས་ལ་གསོལ་བ་འདེབས། ། དྲེགས་ལྡན་འབྱུང་པོས་ཞབས་ཀྱི་པདྨར་བཏུད། ། མཚན་ལྡན་ཌཱ་ཀིས་བདེ་ཆེན་ཡེ་ཤེས་བསྐྱེད། ། ལས་མགོན་ནག་པོས་དམ་ཉམས་མགོ་བོ་ཕུལ། ། གྲུབ་དབང་གཞོན་ནུའི་ཞབས་ལ་གསོལ་བ་འདེབས། ། འོད་གསལ་ངང་དུ་རྗེ་བཙུན་ས་སྐྱ་པ། ། དཀར་པོ་རྣམ་གསུམ་ཞལ་གཟིགས་ལུང་བསྟན་ཐོབ། ། ཞིང་སྐྱོང་དབང་པོས་གཏོར་མ་དངོས་སུ་བླངས། ། ཏིང་འཛིན་དབང་པོ་ཁྱོད་ལ་གསོལ་བ་འདེབས། ། དག་པའི་རྨི་ལམ་ཡུལ་ནས་མདོ་ཁམས་དང་། ། རྒྱ་ཧོར་ཡུལ་གཟིགས་ཨོ་རྒྱན་གནས་སུ་བྱོན། ། ཨིནྡྲ་བྷཱུ་ཏི་དང་མཇལ་སྨོན་ལམ་བཏབ། ། མཁའ་འགྲོས་གསང་རྫས་ཕུལ་ལ་གསོལ་བ་འདེབས། ། རྡོ་རྗེ་གདན་དུ་མ་ཧཱ་བོ་དྷི་མཇལ། ། རང་གི་བླ་མ་མཆོག་དང་གསུང་གླེང་མཛད། ། མུ་སྟེགས་རྣམས་ལ་རྡོ་ཆར་ཕབ་སྙམ་ཚེ། ། སླར་ཡང་བྱམས་པས་བསྐྱངས་ལ་གསོལ་བ་འདེབས། ། གྲུ་འཛིན་རི་བོའི་རྩེ་མོར་སྤྱན་རས་གཟིགས། ། ཞལ་མཇལ་རྩ་བའི་ཙན་དན་ནགས་ཚལ་དུ། ། ཡུམ་མཆོག་སྒྲོལ་མ་ཐ་མལ་བུད་མེད་ཀྱི། ། རྣམ་པར་རོལ་པས་གཟིགས་ལ་གསོལ་བ་འདེབས། ། སྟག་ཞོན་ནག་པོ་སྟག་གི་གཟུགས་སུ་གཟིགས། ། དུར་ཁྲོད་བདག་པོས་ཆུ་བོའི་འཇིགས་ལས་བསྒྲལ། ། གློ་བུར་འབྱོན་ཚེ་རྒྱུན་གཏོར་མཁའ་ངོས་འཕར། ། པེ་ཧར་བཀའ་བཞིན་བསྒྲུབས་ལ་གསོལ་བ་འདེབས། ། དཔལ་ལྡན་ས་སྐྱའི་གཙུག་ལག་ཁང་ཆེན་དུ། ། རྡོ་རྗེ་འཆང་དབང་བློ་གྲོས་རྒྱལ་མཚན་དཔལ། ། བཟང་པོའི་ཞབས་ཀྱི་ཟླ་དབང་མངོན་སུམ་མཇལ། །